چئویرن: ایشیق
ترجمه: ایشیق
ایشیق

saxavat izzati
ایکی قوشما
سخاوت عزتی(عندلیب)

(۱) یوخو دونیا
گل منی قیناما بیلیرم اؤزوم
آغیلدان بالاجا قاتمیشام له‌له!
زاماندا مکاندا یادیمدان چیخیب
ال بویدا شهرده ایتمیشم له‌له!

فیکریمین عنوانین بیله بیلمیرم
ساختا گولوشلرله گوله بیلمیرم
هله کی اؤزومه گله بیلمیرم
ائله کی اؤزومدن گئتمیشم له‌له!

باختیمین شاختاسی عؤمرومو یاخدی
ال چاتماز ذیروه‌ده طالعین تاختی
بو نئجه قیسمتدی بو نئجه باختدی
اوت بیتمز دوزلاقدا بیتمیشم له‌له!

گولورسن گول منه گول قوجا دونیا
منی دفتریندن سیل قوجا دونیا
ایسته‌سن بیله‌سن بیل قوجا دونیا
من سنی اورکدن آتمیشام له‌له!

بیلمه‌دیم نه ایمیش قیسمت عؤمورده
چکدیم آجیلاری هر وقت عؤمورده
طالعسیز عؤمورده بدبخت عؤمورده
چوخ چتین یوللاری گئتمیشم له‌له!

“عندلیب” یوم گؤزون اؤزونو اوخو
قالدی اوزاقلاردا عؤمورون چوخو
دونیا بیر یوخو ایمیش دادلی بیر یوخو
ایندی بو فیکیره چاتمیشام له‌له!

(۲) گلن باهاردی
یئنه داش دیبینده گؤیردی دیشه
شاختادا قورتاردی، قیش‌دا قورتاردی
حزین نفسیله دئییر بنؤوشه
آچین قاپیلاری گلن باهاردی!

هر بوداق باشیندا بیر دسته گول وار
گوللرین اوستونده نه گل ‌ها گل وار
قدیم بابالاردان بئله مثل وار
سویوغون شاختانین مئیدانی داردی
آچین قاپیلاری گلن باهاردی!

یاستی چمنلرده اوتلاییر قوزو
بولاقلار باغرینا باسیب یارپیزی
دوشون داغ دؤشونده اریین بوزو
هر بیر قارانلیغین دان یئری واردی
آچین قاپیلاری گلن باهاردی!

کسمه اومیدینی کسمه باهاردان
اومیددی قورتاران اینسانی داردان
دئمه بیرده چیچک بیته‌جک هاردان
اسنسه کولک دی یاغانسا قاردی
آچین قاپیلاری گلن باهاردی!

عندلیب بو گلن نه خوش قوناقدی
طبیعت یولونا چیچک‌لر یاغدی
هایقیران دره‌دی ، کیشنه‌ین داغدی
دئمه نه های هارای نه شار ها شار دی
آچین قاپیلاری گلن باهاردی!

 

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایکی قوشما / سخاوت عزتی(عندلیب)

ایشیق
www.ishiq.net

آذربایجان ادبیات و اینجه‌صنعت سایتی

ایکی قوشما / سخاوت عزتی(عندلیب)

ایشیق
www.ishiq.net

آذربایجان ادبیات و اینجه‌صنعت سایتی

ایکی قوشما / سخاوت عزتی(عندلیب)

ایشیق
www.ishiq.net

آذربایجان ادبیات و اینجه‌صنعت سایتی