ساراسی اؤلن داغ
انصار قره‌داغی
بو ساراسی اؤلن داغدا خان چوبان
قویما بیزیم قوزولاری قورد یئسین!
دده‌لری اوبالاردا کده‌ر ـ غم
ننه‌لری کومه‌لرده درد یئسین،
قویما بیزیم قوزولاری قورد یئسین!
بالا چوبان اله آلمیش چوماغین
قالدیریبدیر یایلاقلارین بایراغین
یئل ییخانمیر اوباسینین چارداغین
توتئی ـ توتئی داغا سالمیش او سسین
قویما بیزیم قوزولاری قورد یئسین!
او گدیکده دوران نئجه لله‌دی
بو بولاغین مئیلی هانسی گؤله‌دی؟
دولو دوشدو؛ املیک قوزو مله‌دی
حیات درسی نه رحماندی، نه یاسین
قویما بیزیم قوزولاری قورد یئسین!
قارلی داغلار بیر شال باسمیش باغرینا
چوبان قویما داغین باغری آغرینا
کؤنلوموزون قوی سئگاهی اوغرونا
اؤیره‌ت بیزه الیف ـ باسین بو درسین
قویما بیزیم قوزولاری قورد یئسین!
قوزونو یوخ، چوبان قایتار یازینی
اصلی چالسین خان کرمین سازینی
بیزده گؤره‌ک او ائرمنی قیزینی
سئل آپاردی بیر عؤمرونده ساراسین
قویما بیزیم قوزولاری قورد یئسین!
کؤلگه‌لره سالام وئریر بو قایا
لعنت گله قارا سئله؛ او وایا
دومان دورموش، گون دوشمه‌ییر اوبایا
ماجال وئرمیر روزگار درسین نفسین
قویما بیزیم قوزولاری قورد یئسین!
سن سارایلا اوتورمادین گؤز ـ گؤزه
بولاقلارین قیبله‌سیدیر بو کوزه
خان بولاغی آلیشدیمی دردیزه
بو بولاغین دوداقلاری، دور، دئسین
قویما بیزیم قوزولاری قورد یئسین!
بو دیاردا مخلوق خانلیق آختاریر
آمما « انصار » خان چوبانلیق آختاریر
آمان ! … قوردلار بوز دومانلیق آختاریر
قورددان توتموش بیر ایتی وار هر کسین
قویما بیزیم قوزولاری قورد یئسین!
۱۳۹۳/۳/۱۲
