باش ایمه‌دیم
ع.ن. چاپار
من سولارا باش ایمه‌دیم،
سو اؤپمه‌دیم؛
و دئمه‌دیم اسراریمی
هئچ بیر سویا…
من داشلارا باش ایمه‌دیم،
داش اؤپمه‌دیم؛
و دئمه‌دیم اسراریمی
هئچ بیر داشا…
سو تانری‌دیر؛
قدرتیندن
یاشیللیقلار گؤیرمیشدیر قارا یئردن؛
او گلمیشدیر حیات وئرسین بیزه گؤی‌دن.
سو سیرریمی ساخلایانماز ؛
و دئمه‌دیم اسراریمی
هئچ بیر سویا…
داش تانری‌دیر؛
بینالارین بینؤوره‌سی
باسیلمیشدیر داشدان بوتون؛
داش هئیکل‌لر
بوت اولموشدور چوخ بیر زامان.
داش سیرریمی ساخلایانماز؛
و دئمه‌دیم اسراریمی
هئچ بیر داشا…
اسراریملا-
عؤمور سوردوم من بیر باشا!
